-
Iss mozou per yeh apni tarah ki pehli kitaab hai ba'az logon ko yeh kitab bold lagey gi aur ba'az ko waqt ki awaz ya shayad kuch ko lagey kay yun khuli baat nahin honi chahiyie thi.
-
Parhtey huey yaad rakhiyie kay shadi shuda khawateen jab inn masail sey guzar rahi hoti hain to woh kis sey mashwara karein, sab ko to masla bataney ka na moqa hota hai aur na ijazat, to iss tarah un ko apney masail aur pareshaniyon sey nimatney ki raah miley gi.
-
Meiney iss mozou per likhney kay liye barso'n parha, socha, phir yakso hua to likha. Yeh kitab kisi mazey ya tajurbey kay liye na sochi hai na likhi hai . Yeh sab batana iss liye zaroori hai kay aap khuley dil aur zehen sey iss ka muta'alla kar sakein.
Shukriya
Mein mumtaz scholar janab Allama Javed Ahmed Ghamidi ka tah'e dil sey mamnoon hun kay unhon ney iss kitab ka muswadda parhney kay liye apna nihayat qeemti waqt diya aur iss par mashwaron sey sarfaraz kiya.
Apney jigri dost lieutenant Muhammad Rafeeq ka khusoosi shukriya kay unn kay mardanawar mashwaron ki wajah sey kitab mein ba'az bunyadi tabdiliyan kiin.
Bey hudd mukhlis dost aur ma'aroof adeeb janab Akhtar Abbas ka bey hudd shukar guzar hun jinhon ney kitab ka muswadda parha aur mufeed mashwarey diye. Ka'ee mawaqa'e per merey dil ki awaz ko lafzon ka roop diya aur meri yaksuee ka baa'iss baney.
|
